ಸಂತೆಯೊಳಗೊಂದು

 ಸಂತೆಯೊಳಗೊಂದು ಮನೆಯ ಮಾಡಿ ಶಬ್ದಕೆ ನಾಚಿದೊಡೆಂತಯ್ಯ ?

ನಿಜ. ಹೈವೆ ಪಕ್ಕದಲ್ಲಿ ಮನೆಮಾಡಿ ದಿನ ಬೆಳಗಾದರೆ - ಬೆಳಗಾಗುವ ಎಷ್ಟೋ ಮೊದಲೇ ಗಾಡಿಗಳು ಪ್ಯಾ ಎಂದೋ ಪೆಪೆಪೇ ಎಂದೋ ಕೂಗುತ್ತವೆ ಎಂದು ದೂಷಿಸಲಾಗುತ್ತದೆಯೇ?

ನಡುರಾತ್ರಿಯಲ್ಲಿ ವಾಹನಗಳ ವ್ರನ್ದಗಾನಕ್ಕೆ ನಾವು ಶತಸಾಹಸ ಮಾಡಿ ಬಾರಿಸಿಕೊಂಡ ನಿದ್ರೆ ಬಲಿಯಾದರೆ ತಪ್ಪು ಯಾರದು? ರಸ್ತೆಗೆ ಇಳಿದು ಅವರನ್ನು ಅಡ್ಡಗಟ್ಟಿ ಅವರ ಬಾಯಿ /ಹಾರ್ನು ಮುಚ್ಚಿಸಲಾಗುವದಾ? 

ಪಾಡ್ಕಾಸ್ಟ್ ಕೇಳಿ, ಯೂಟ್ಯೂಬ್ ನೋಡಿ, ಕಡೆಗೆ ರಾಮ ನಾಮ ಸ್ಮರಣೆಯನ್ನೂ ಮಾಡಿ, ಮುದ್ರೆ ಮಾಡಿ, ಅನುಲೋಮ ವಿಲೋಮ ಇನ್ನೋಂದುಲೋಮ ಮಾಡಿ, ಅಂತೂ ಇಂತೂ ಬಂದ ನಿದ್ರೆ ನಾಶವಾಯಿತಾ ? ಪಾಪಿಗಳು, ಪಾಪಿಗಳು. ಮುಂದಿನ ಜನ್ಮದಲ್ಲಿ ನಿದ್ರಾಹೀನತೆಯಿಂದ ನನ್ನಂಗೆ ತೋಳಲ್ತಾರೆ. 

ಇನ್ನು ಧೂಳೋ , ಕೇಳಲೇ ಬೇಡಿ. ಮನೆಯ ಪ್ರತಿ ಕೋಣೆಯಲ್ಲೂ ದೊಡ್ಡ ದೊಡ್ಡ ಕಿಡಕಿಗಳು. ತೆರೆದರೋ, ಧೂಳಿನ ಪ್ರವಾಹವೇ ಬಂದು ಬಿಡುತ್ತದೆ. ಯಾವ ಸರ್ಫೆಸ್ ನೋಡಿದರೂ ಒಂದಿಂಚು ಧೂಳು. 

(ನಾನು ಈ ಧೂಳನ್ನು ರೀ-ಸೈಕಲ್ ಮಾಡುವ ಪ್ಲಾನ್ ಹುಡುಕಬೇಕು, ಬಹುಶ: ನನ್ನ ಗಿಡಗಳಿಗೆ ಮಣ್ಣಾಗಿ )

ಶಬ್ದಕ್ಕೆ ವಾಪಸ್ ಬರೋಣ.  ನಮಗೆ ಮನೆ ರಸ್ತೆಯಿಂದ, ಬಸ್ ಸ್ಟಾಪಿನಿಂದ, ಮಾರುಕಟ್ಟೆಯಿಂದ, ಶಾಲೆಗಳಿಂದ, ಆಸ್ಪತ್ರೆಯಿಂದ ತುಂಬಾ ಹತ್ತಿರವಿರಬೇಕು. ತಲೆಗೆ ಒಂದೂವರೆ ವಾಹನವಿದ್ದರೂ ಕೂಡ. ಆದರೆ ರಸ್ತೆಯ ಶಬ್ದಮಾಲಿನ್ಯ, ಪಾಲುಶನ್ ಬೇಡ.ಅದು ಸಾಧ್ಯವಾ? 

ಇದು ಪ್ಯಾಕೇಜುಡೀಲ್ ಮಾರಾಯರೆ. ಅನುಕೂಲದ ಜೊತೆ ಪೊಲ್ಲ್ಯೂಷನ್ ಫ್ರೀ.