ಅರಸನ ಆಜ್ಞೆ

 ಅರಸನ ಆಜ್ಞೆ ಇಲ್ಲ - ದೆವ್ವದ ಕಾಟ ಇಲ್ಲ

 ಮದುವೆಯಾದಾಗಿಂದ ವಿಭಕ್ತ - ಅವಿಭಕ್ತ ವಿರುದ್ಧ ಅದೇ ತಾನೇ - ಚಿಕ್ಕ ಕುಟುಂಬದ ಯಜಮಾನತಿಯಾಗಿರುವ ನನಗೆ ಅರಸನ ಆಜ್ಞೆ ಇರಲಿಲ್ಲ - ದೆವ್ವದ ಕಾಟ ಇರಲಿಲ್ಲ. 

ಈಗ ಬೇರೇ ಸ್ಥಿತಿ. ಆಜ್ಞೆ ಇಲ್ಲದೇ ಹೋದರೂ ಕಾಟ ಮಾತ್ರ ಸುಮಾರು ಇದೆ. 

ಮನೆಯಂಗಳವನ್ನು ಚೆನ್ನಾಗಿ ಇಟ್ಟುಕೊಳ್ಳಬೇಕು - ದಿನವೂ ಮೂರು ಜನ ಗುಡಿಸಿ - ಸಾರಿಸಿ ಅಲಂಕರಿಸಬೇಕು. ಮೂರು ಜನ - ನಾನು, ಮನೆಯವರು ಹಾಗೂ ಕೆಲಸದವಳು ಪ್ರತಿದಿನ ಗುಡಿಸುತ್ತೇವೆ - ಯಾಕೇ - ನೆರೆ-ಹೊರೆ ದಿನವಿಡೀ ಕಣ್ಣೆಲ್ಲ ಇಲ್ಲೇ ಇಟ್ಟಿರುತ್ತಾರಲ್ಲಾ - ಅವರಿಗೆ ನೋಡಲು ಚಂದ ಕಾಣಬೇಕು ತಾನೇ?

ಇನ್ನು ಮನೆಯೊಳಗೋ - ಸ್ವಲ್ಪ ಹೆಚ್ಚು ಕಮ್ಮಿ ನಡೆಯುತ್ತದೆ - ಯಾರು ನೋಡುತ್ತಾರೆ, ಯಾರು ಹೇಳುತ್ತಾರೆ? ಅತ್ತೆಯೋ ಮೇಲೆ ಶಿವನ ಪಾದ ಸೇರಿಯಾಗಿದೆ. ಸೊಸೆ ದೂರದೂರಲ್ಲಿ ಕುಳಿತಿದ್ದಾಳೆ. ಹಾಗಾಗಿ ನಾನು ಸುಂದರವಲ್ಲ, ಫಂಕ್ಷನಲ್ ಅಡಿಗೆಮನೆ ನಡೆಸಿಕೊಂಡು ಬರುತ್ತಿದ್ದೆ.

ಆದರೆ ಈಗ ಇಲ್ಲೂ ಕಾಟ ಆರಂಭ - ಈ ಐದಡಿ ಅರವತ್ತು ಕಿಲೋ ತೂಕವನ್ನು ಹೆದರಿಸುತ್ತಾ ಇರುವದು ಅಣು-ರೇಣುವಿನ ಗಾತ್ರದ ಇರುವೆ. ಅರೆ ಕ್ಷಣ ಆಲಸ್ಯದಿಂದ ಕಸ-ಗಿಸ ಅಡಿಗೆ ಮನೆಯಲ್ಲಿ ಬಿಟ್ಟರೆ - ಬಂದು ಬಿಡುತ್ತದೆ - ಸೈನ್ಯ - ಅನಾದಿ-ಅನಂತದ ಸಾಲು. ಸಕ್ಕರೆ, ಬೆಲ್ಲ, ಹಾಲು, ಕಡೆಗೆ ಅನ್ನಕ್ಕೂ ಲಗ್ಗೆ ಇಟ್ಟು ಸಮರ ಘೋಷಣೆ ಮಾಡಿಬಿಡುತ್ತದೆ. 

ಹಾಗಾಗಿ ಅನಿವಾರ್ಯವಾಗಿ ಸುಂದರ, ಸ್ವಚ್ಛ ಮನೆಯನ್ನು ಮಾನೇಜ್ ಮಾಡುತ್ತಾ ಇದ್ದೇನೆ.